A delegada territorial da Xunta en Ferrol, Martina Aneiros, visitou hoxe o CIS Tecnoloxía e Deseño no que a Axencia Galega de Innovación imparte obradoiros de fomento das vocacións tecnolóxicas para o alumnado de centros educativos.
A este respecto a delegada territorial lembrou a necesidade de “formar e atraer talento cara un sector de gran potencial” como o tecnolóxico e destacou “a implicación do Goberno galego á hora de impulsar a vocación científica desde as idades máis temperás”.
Un total de 50 alumnos do IES Sofía Casanova participaron, divididos en dous grupos, no taller “Explorando os mundo virtuais”, o primeiro dos cinco obradoiros D’Tec que se van celebrar este trimestre no CIS Tecnoloxía e Deseño orientados á Educación Secundaria. A proposta ten como finalidade achegar á mocidade a actividade que desenvolve o centro situado na Cabana e aproximala á creación de contido de realidade aumentada (AR) e realidade virtual (VR). Para iso os escolares tiveron a oportunidade de crear contido de realidade virtual que despois puideron recrear a través de diferentes dispositivos.
Este é un dos talleres educativos D’Tec para grupos centrados en temáticas ligadas á actividade do CIS Tecnoloxía e Deseño e nos que participaron máis dun milleiro de rapaces de diferentes centros educativos nos últimos dous cursos. Ademáis dos talleres, o programa de fomento das vocacións científico-tecnolóxicas da GAIN inclúe a celebración de espectáculos científicos D’Tec de 60 minutos de duración e orientados a alumnos de Educación Primaria e Secundaria, dos que o pasado ano gozaron 430 estudantes.
No período 2019-2021, o CIS Tecnoloxía e Deseño levou a cabo actividades orientadas ao fomento das vocacións STEM nas que participaron máis de 3.500 estudantes de 112 centros educativos de toda Galicia.
Fonte: Novas Xunta
