A Xunta de Galicia, a través da Consellería de Economía e Industria, organiza novas actividades educativas e de comunicación científica ligadas á enerxía, orientadas a fomentar o interese pola ciencia e a tecnoloxía.
O CIS Galicia, como centro adscrito á Consellería de Economía e Industria a través da Dirección Xeral de Planificación Enerxética e Minas, é o lugar elexido para desenvolver estas novas actividades.
TALLERES “DESCUBRINDO A ELECTRICIDADE E “DESCUBRINDO A ENERXÍA – EDUCACIÓN PRIMARIA
DATAS: 5 de novembro | 7 de novembro | 10 de novembro | 11 de novembro de 2025.
NIVEL EDUCATIVO: 5º – 6º Educación Primaria.
Nesta actividade organizamos unha mañá dedicada a descubrir o mundo da electricidade e a enerxía. O alumnado achegarase aos fundamentos da electricidade a través da práctica. Identificarán materiais condutores e illantes, construirán circuítos sinxelos con plastilina condutiva e experimentarán con diferentes formas de iluminación e movemento. Ademais os estudantes introduciranse no concepto de enerxía e nas súas transformacións mediante experiencias sinxelas e dinámicas, como a xeración de electricidade cunha dínamo, con froitas ou cun panel solar. Ademais, reflexionarán sobre as diferenzas entre fontes renovables e non renovables a través dun xogo interactivo e descubrirán o potencial de Galicia como referente en enerxías verdes.
Máis información na seguinte ligazón.
TALLERES “MUNDOS ELÉCTRICOS” e “DESCUBRINDO AS ENERXÍAS RENOVABLES” – EDUCACIÓN SECUNDARIA
DATAS: 17 de novembro | 18 de novembro | 24 de novembro | 25 de novembro de 2025.
NIVEL EDUCATIVO: 1º – 4º Educación Secundaria Obrigatoria.
Nesta actividade propoñemos unha mañá dedicada a experimentar e reflexionar arredor da enerxía, a súa xeración, usos e impacto no noso día a día. Os participantes mergullaranse nos conceptos fundamentais ligados á electricidade: carga, corrente, tensión, resistencia e potencia. A través de experiencias prácticas con xeradores, materiais condutores e illantes, comprobarán as propiedades da electricidade e aprenderán a construír circuítos sinxelos e combinados. Introducirase ao alumnado no concepto de enerxía e nas súas diferentes fontes, reflexionando sobre as vantaxes e limitacións das fósiles fronte ás renovables. Analizarase o papel de Galicia na produción enerxética, especialmente na eólica, destacando o seu potencial. A través de experimentos, construirán un circuíto alimentado con placas solares e un coche a escala movido por unha célula de hidróxeno. Finalmente, os estudantes deberán crear un xoguete iluminado cun sistema de xeración eólica, probando os seus deseños con ventiladores.
Máis información na seguinte ligazón.
ESPECTÁCULO EXPLORANDO A ENERXÍA
DATA: 19 de novembro de 2025.
NIVEL EDUCATIVO: Educación Secundaria Obrigatoria | Bacharelato | Formación Profesional.
Este espectáculo é unha experiencia educativa que combina ciencia, tecnoloxía e diversión, para descubrir a importancia da enerxía dun xeito práctico, sorprendente e inspirador. Esta actividade divídese en dúas partes: unha Escape Room grupal, que convida a aprender xogando, e un Show científico sobre a enerxía, cheo de experimentos espectaculares.
Máis información na seguinte ligazón.
