O pasado 25 de marzo técnicos do CIS Tecnoloxía e Deseño instalaron no Centro Integrado de Formación Profesional de Santiago un simulador de vernizado cedido por GAIN a este centro de formación de adultos da Consellería de Emprego e Igualdade.
O CIFP Santiago na súa oferta formativa conta con ciclos que contemplan os acabados de madeira, e este simulador permitirá tanto avaliar obxectivamente as capacidades do alumnado como identificar os puntos de mellora. O uso do simulador nas primeiras fases de aprendizaxe do vernizado a pistola permite un aforro en custes e materiais, podendo incrementarse o número de prácticas iniciais, así como evitar o uso de materias contaminantes, polo que supón unha mellora para o medio ambiente e a saúde. Por estas razóns o CIFP Santiago contempla o uso do simulador como parte do seu programa formativo.
O CIS Tecnoloxía e Deseño xa colaborou previamente co CIFP Santiago, poñendo a proba o simulador durante máis dun mes durante a etapa de desenvolvemento, a boa disposición a novas propostas converteu aquela experiencia en positiva e permitiu incorporar melloras. Ao dispor desta ferramenta dun xeito mais sistemático, o CIS terá boas aportacións para desenvolvementos futuros.
