Silvia Iglesias e Sara Carrasco, integrantes da cooperativa 13 Grados e impulsoras do proxecto de emprendemento SUBGO visitaron as instalacións do CIS Tecnoloxía e Deseño o pasado 17 de novembro. A visita enmárcase dentro das actividades que o centro desenvolve como socio do proxecto europeo Sherpa do Mar.

O proxecto de emprendemento SUBGO é un proxecto de educación ambiental que pretende achegar ao público a riqueza submariña das costas galegas mediante tecnoloxía de Realidade Virtual ou Aumentada.

A iniciativa, que actualmente estase a acelerar dentro do proxecto europeo Sherpa do Mar, concretarase nun espazo de divulgación itinerante que incluirá fotografías, ilustracións, actividades interactivas e unha experiencia inmersiva de 360º polos paisaxes sumerxidos das costas galegas.

Durante a visita, as emprendedoras puideron familiarizarse coas diferentes aplicacións e demostradores de Realidade Virtual e Aumentada realizados polo centro, e coñecer, grazas a experiencia dos técnicos do área de Industria Dixital do CIS Tecnoloxía e Deseño, as posibilidades e características técnicas dos distintos equipos e tecnoloxías empregadas. Esta visita, así como o resto de actividades que están a levar a cabo no seu itinerario de aceleración, permitirá as promotoras o desenvolvemento do seu proxecto con maiores posibilidades de éxito.

Sobre Sherpa do Mar

Sherpa do Mar é un proxecto integrado no Programa de Cooperación Transfronteiriza INTERREG VA España-Portugal (POCTEP) 2014-2020, cofinanciado nun 75% por fondos FEDER, que ten como finalidade por en marcha unha rede transfronteiriza de emprendemento no ámbito marino-marítimo e a economía azul, a través do programa Sherpa Journeys, que favorece a creación de emprego e o aumento da competitividade empresarial mediante o fomento das empresas de base tecnolóxica.

O proxecto está liderado pola Universidade de Vigo, a través do grupo de investigación REDE, Campus do Mar e a Oficina de I+D, e nel participa o Consorcio Zona Franca de Vigo, a Axencia Galega de Innovación, a Universidade de Santiago de Compostela e a Universidade de A Coruña. Por parte de Portugal, participa a Associacão de Transferência de Tegnologia de Asprela (UPTEC), a U.Porto-Innovação da Universidad de Oporto (UPIN), o Centro Interdisciplinar de Investigação Marinha e Ambiental (CIIMAR) e Fórum Oceano-Associação da Economia do Mar.