O simulador de vernizado resultado do proxecto Future Facing do programa Erasmus+ vai ser utilizado para a formación nos centro galegos de Formación Profesional da familia de Madeira.
Os centros formativos dispoñen xa dos equipamentos necesarios e os técnicos do CIS Tecnoloxía e Deseño están realizando sesións formativas para que poidan explotar todas as posibilidades e usos formativos.
Realizamos sesións formativas presenciais no CIFP Ferrolterra o 30 de setembro, á que acudiron tamén profesorado do CIFP Someso e do IES de Ortigueira.
Dada a situación provocada polo COVID 19 realizaremos sesións formativas virtuais, materiais formativos audiovisuais e tutorías online para o uso polo profesorado.
O simulador consta dos elementos físicos para realidade virtual inmersiva, un software de realidade virtual que sitúa ao alumno nun taller de vernizado e rexistra o que se fai; posteriormente o profesor dispón dunha ferramenta que o analiza e permite correxir e mellorar o proceso.