Programa D’tec: Talleres En caída. Tecnolab e Cosendo o futuro

NIVEL EDUCATIVO: Educación Secundaria Obrigatoria | Bacharelato | Formación Profesional.

Para cada xornada organízanse dúas actividades de maneira que os centros escolares poidan participar en ámbalas propostas. Os estudiantes asistirán ás dúas alternando as sesións.

PRAZAS POR TALLER: Máximo 30 (en total 60 estudantes por xornada).

HORARIOS:
Primeiro taller de 10.00 h a 11.30 h.
Segundo taller de 12.00 h a 13.30 h.

Taller D’tec En caída. Tecnolab

A actividade consiste nunha aproximación experimental á telemetría e ao deseño. Os participantes terán unha dobre misión. Por unha banda, deseñar un sistema de descenso para un piloto de probas (un ovo) e polo outro, programar un sistema que lles permita recoller datos mediante telemetría, monitorizando diferentes parámetros do descenso. O reto consistirá en conseguir que o noso piloto sobreviva e que o dispositivo recolla os datos da caída, que deberán manterse en valores compatibles coa supervivencia do piloto.

Contidos do taller

Presentación do reto. Cada grupo de estudantes deberá preparar un sistema de aterraxe que inclúa un sistema de telemetría que rexistre varios parámetros. O reto terá dous obxectivos: Que o noso astronauta sobreviva ao descenso sen danos e que a velocidade se sitúe dentro dun rango de valores que se lles indicarán.
Desenvolvemento de prototipos. Para iniciar a construción de prototipos, deberán presentar aos docentes un bosquexo – esbozo detallado da súa idea inicial de prototipo e superar unha análise crítica.
Programación de telemetría mediante Microbit. O seguinte paso é desenvolver o sistema de recollida e transmisión de datos. Para iso, partirase de cero, para que o alumnado sen nocións previas poida alcanzar os obxectivos expostos.
- Que é Microbit? Iniciación ás placas programables.
- Creación de programas básicos con microbit.
- Programación de sistema de telemetría para os prototipos.
Lanzamento. Lanzamento dos prototipos e selección dos máis eficientes. Os criterios serán:

Supervivencia astronauta.
Correcto funcionamento da telemetría.
Peso do prototipo.

Reflexión final. Para finalizar a actividade, levarase a cabo unha reflexión final sobre a importancia da innovación, o deseño e a creatividade para a sociedade.

Taller D’tec Cosendo o futuro. Os e-téxtiles

Hoxe en día estamos rodeados de materiais innovadores, que cada vez se integran máis na nosa vida cotiá. E os tecidos non escapan a esta revolución. Comprobámolo? Durante o taller recibiremos unha formación básica en programación e posteriormente pasaremos á fase de deseño, creando unha peza ou complemento que integrará unha placa electrónica programable e reaccionará aos estímulos que programemos (cambios de intensidade de luz, ruído, movemento…).

Introdución aos e-téxtiles. Antes de iniciar a parte creativa da actividade, presentarase ao alumnado o concepto de e-téxtil e as súas implicacións de futuro.
- Que é un e-téxtil?
- Materiais utilizados en e-téxtiles.
- Exemplos.
Iniciación ás placas programables. Pártese da premisa de que o alumnado non ten coñecementos previos. Se os posúen, presentaremos funcións máis avanzadas.
- Que é unha placa programable?
- Exemplos de placas. Microbit e Calliope Mini.
- Iniciación ao uso de MakeCode.
- Programando Microbit con dispositivos móbiles.
- Montaxe de leds externos en Microbit utilizando fío condutivo.
Creación dun e-téxtil. Por parellas, o alumnado creará e programará un e-téxtil. Inicialmente, exporánselles distintas opcións, pero se algún grupo o desexa, poderá desenvolver unha iniciativa propia previa aprobación por parte dos docentes.
- Creación dun bolso sensible ao movemento.
- Deseño dunha bandana con xogo incorporado.
- Creación de broches reactivos ao son.
Presentación de proxectos. Unha vez creados os produtos, os grupos presentarán aos compañeiros os seus proxectos.
Reflexión final. Para acabar, incidiremos na importancia da innovación, o deseño e a creatividade e o seu potencial como ámbitos laborais e valoraremos co alumnado de xeito informal a actividade.